New Delhi(SPR) Magaalada New Delhi ee caasimada India waxaa ku sugan Madax ka socota Puntland uu horkacayo Madaxweyne Abdirahman Sheikh Maxamed Faroole, iyadoona uu wefdigaasi qayb lixaad leh ku leeyahay wasiirka arimaha gudaha Abdulaahi Axmed Jaamac Ilkajiir.

Madaxweyne Faroole iyo wefdigiisa ayaa kulamo shalayto gelinkii dambe New Delhi kula qaatay madax ka socota safaarada Soomaalida ee India oo ay horkacayo Ambbasador Abyan Salah iyo weliba xubno ka socda wasaarada Arimaha debeda India oo soo wefdiga iyagu casumay.

New Delhi waxaa la filayaa in uu maanta ka dhaco kulan xasaasi ah oo dhexmaraya Madaxweyne Faroole iyo madaxda uu horkacayo iyo weliba madax uu ka mid yahay Ra,isal wasaaraha dalka India Manmohan Singh iyo madax ka tirsan wasarada arimaha debeda ee dalkaasi India.

War ka soo baxay safaarada Soomaalida ee India ayaa sheegaya in uu maanta dhacayo kulanka ra,isal wasaraha India iyo Madaxweyne Faroole, waxaana ay diirada saari doonaan xaalada Soomaaliya gaar ahaan tan Puntland, iyadoona Madaxweyne Faroole la filayo in uu Madaxda India kala hadlo arimaha horumarinta Technolajiyada.

Jimcihii tegay ayaa Madaxweyne Faroole iyo wefdi uu horkacayo waxaa ay ka duuleen Garoowe iyagoo gaaray Adis Ababa kadibna kulan la qaatay Madax uu ka mid yahay wasiirka arimaha debeda Ithopia ahna ku xigeenka ra,isal wasaaraha dalkaasi, sidoo kale waxaa nairobi iyana ka duulay Madax uu ka mid yahay Abdulaahi Ilkajir oo ku biiray wefdi Madaxweye Faroole.