Rochester (SPR): Waxaa wali magaalada Minneapolis ku sugan gudoomiyaha kooxda Waayaha Cusub Shiine Akhyaar isla markaasina u yimid dalka Mareykanka kadib markii ay dowlada Mareykanka ay 24 wadan oo ka tirsan qaarada Afrika ay kasoo qaadatey midkiiba halka fanaan oo ah fanaanka ugu firfircoon si markaasi loogu taba baro, siminaaro loogu faa’ideeyo, iyagana ay wacyi galin u sameeyaan bulshada ku dhaqan Mareykanka.

Dhalinyarada reer Rochester oo ah magaalo masafo hal saac ah u jirta magaalada Minneapolis iyo Ururka SIPR ayaa waxay casuumaad u fidiyeen Shiine Akhyaar iyadoo isla markaasina lagu gudoonsiiyey gudoomiyaha Waayaha Cusub bilad sharafta loo yaqaan (SIPR Ambassador of Peace Award).

Dr. Sh. Noor Qaasim Abukar oo ah gudoomiyaha SIPR isla markaasina ah nin u ololeeya midnimada iyo xal u helida dalka iyo dadka Soomaaliyeed, isla markaana kasoo jeeda Qoys ehel u ah wadaniyada iyo xornimada ummada Soomaaliyeed ayaa idaacada Somali Public Radio u sheegey in bilad sharaftan ay tahay mid ay kaliya siiyaan shaqsiyaadka yagleelka nabada naftooda, waqtigooda, iyo waliba maalkoodaba u hurey. Taasoo ayuu yiri ah mid aan ku dhiiri galin aan uga danleenahay, Sheekh Noor. Gudoomiye Sheekh Noor oo nagu casumey aqalkiisa iyo sidoo kale xafiiska SIPR ee gobolka Minnesota ayaa wuxuu sharaxaad ka bixiyey wax qabadkii SIPR, sababaha loo aasaasey, iyo waliba ula jeedada loo alkumey.

Mudane Sheekh Noor ayaa sheegey in SIPR ay aasaaseen dad aqoonyahana ah oo ku sugan dalka Mareykanka oo isla gorfeeyey cilmi-baaris kadib isla meel dhigey in ay sameeyaan hay’ad ummada ku wacyi galisa nabada, una dooda xuquuqda dadka la dulmiyey.

“Waxaanu ogaaney dhibka ugu weyn ee Soomaalida heysta inuu yahay is aaminaad la’aan, taasoo oo dhalisey in ay xitaa dadka iyagoo aan is dhageysan ay kala caroodaan” ayuu yiri Sheekh Noor. Isagoo hadalkiisa sii wata ayaa wuxuu yiri waxaa inoo soo baxdey in is Aaminaad la’aanta looga bixi karo; marka hore in la is dhageysto iyadoo aan ra’yiga xitaa la isku raacin, marka xigana in la isku tixgaliyo qof waliba ra’yigiisa.

Sheekh Noor ayaa ka sheekeeyey sababaha ay u siiyeen bilad sharafta kooxda Waayaha Cusub, isagoo xusey in ay ku dhiirteen wax ay dad badan ku dhiiran waayeen, taasoo ah in ay dhaliilaan falalka amni xumida keena isla markaana dadka ku booriyaan nabad galyada. Dalmar Yare oo ka mid ah kooxda Waayaha Cusub iyo Shiine Akhyaar oo bilad sharaftaasi gudoomay ayaa ku tilmaamay mid sharaf weyn u ah isla markaasina ay mahad balaaran uga hayaan bulshada reer Minnesota iyo Hay’ada SIPR.

Booqo Facebooga Somali Public Radio Islamarkaana Member Noqo oo Toos u Hela Warar: HALKAN riix oo taabo "LIKE"...https://www.facebook.com/pages/SOMALI-PUBLIC-RADIO/136432283054472  

HOOS KA DAAWO SAWIRADA